Badi Bahu

Badi Bahu

Har taraf chahal pahal thi. Har koi vayasth tha. kisi  ko bhi saans lene ki fursat nahi thi. Ramu kaka abhi tak phool nah aaye. Aa rahe hain badi bahu. Banshi kaka mithai ka kya hua, aadhi tyar hai aur baaki ban rahi hai. Halwai ko bolo ki jaldi- jaldi haath chalaye. Shyamu dulhan ke gahne  nahi pahunche. Jara sunhaar ko bulawa bejo, bolo badi bahu ne bulwaya hai. Radha abhi tak haveli ki safai nahi hui. Abhi hui jaati hai badi bahu.

Badi bahu ek-ek karke harek naukar ko kaam bata rahi hai. Sab taraf  bhag-daud lagi hai. Aakhir kyon na ho aaj badi bahu ki eklauti beti Anjali ki shaadi hai. Badi haveli mein badi bahu   apne pati  Thakur Vikram Singh  aur unki maa  ke saath rahti hain. Par badi haleli mein hukum sirf badi bahu ka chalta hai. Aur choti haveli mein Thakur Ranjeet Singh, Thakur Vikram Singh ke chote bhai apne parivaar ke saath rahte hain.

Thakur Ranjeet Singh hi jameen jaidaad ke kaam dekhte they. Thakur Vikram Singh sirf naam ke Thakur they. Saara kaamkaaj Ranjeet Singh dekhte they. Unka raub aur unka dar poori riyasat mein faila hua tha. Shaam hone ko chali thi aur  Haveli ki sajawat ka kaam abhi bhi chal raha tha. Badi bahu kabhi shaadi ki rasmon ko nibhati aur kabhi shaadi ka kaamkaj  dekhti. Poori haveli dulhan ki tarah saji hui thi.

Saara kaam poora hone par  badi bahu ne poori haveli par ek najar daali ki kahin koi kami toh nahi rah gayi. Haveli ko iss tarah saja dekh badi bahu ko apne purane din yaad aa gaye. Aur woh  pareshaan ho gayi. Unka saara sharir paseene se bheeg gaya. Unhone apne kamre ki ore rukh kiya. Itne mein badi bahu ki najar Anjali par padi. Jo puri tarah se tyar ho chuki thi. dulhan ke jode main woh Bilkul badi bahu ka pratibimb lag rahi thi. Badi bahu ko aisa laga jaise Anjali ke roop mein Anjali nahi woh khud kadi hain.

Woh jor-jor se chilane lagi. Aur chillate-chillate apne kamre ki ore daud padi. Unhone apna kamra ander se band kar liya. Aur kamre ka saara saaman idhar-udhar fainkne lagi. Badi bahu ka shor sunkar saari haveli mein khamoshi cha gayi. Sab pareshaan ho idhar-udhar ghumne lage. Har koi ye hi soch raha tha. Ki badi bahu ko kaise shaant Karen. Baarat ka aane ka time ho chala tha.

Shaare rishtedaaron mein kaanafusi shuru ho gayi. Badi bahu ka shor sunkar radha Thakurain ke paas pahunchi. Aur boli Thakurain badi bahu ko fir se daura pada hai. Thakurain hairaani se boli daura lekin aaj toh pooranmasi nahi hai. Ab kya hoga badi bahu ko toh thik hone mein do-teen din lag jaate hain. Baarat aane wali hai.  Hum logon ko kya kahenge…..

Aaj se thik 25 saal pahle, kartik maas ki pooranmasi ko Thakur Vikram Singh aur badi bahu ki shaadi hui thi. Thik tabi se har poorinma ko badi bahu ko daura padta hai. Aur unhe normal hone mein do se teen din lag jaate hain. Badi bahu in dino ke dauraan apne aap ko kamre mein band kar leti hain. Aur fir rah-rahkar kamre se chillane ki awaajen aati rahti hai aur kabhi kisi samaan ke tutne ki.  25 saalon se ye sil-sila yon hi barkaraar hai. Aisi haalat mein koi bhi badi bahu ke saamne nahi jaata. Khaana-peena bhi unhe khidaki se diya jaata hai.

Jo koi bhi kamre mein ghusne ki koshish karta hai. Badi bahu usi par koi saaman faink deti hai. Aaj tak pata nahi kitne naukron ke sar, mathe, haath aur paire tut chuke hain. Do-teen din ke baad sab thik ho jaata hai. Darwaja apne aap khul jaata hai. Badi bahu har kisi ka khyal rakhti hai. Unhe har kisi ki chinta rahti hai. Sabhi badi bahu ki bahut ijjat karte hain. Unhe sammaan dete hain. 

Sabhi log badi uljhan mein hain ki badi bahu ke baigair shaadi ki rashmein puri kaise hongi. Lekin badi bahu ko shaant karna bhi muskil tha. Anjali ne apne pita Thakur Vikram Singh ko maa ko shaant karne ke liye kaha. Thakur vikaram Singh ne ashamartha dikhai. Waise bhi badi bahu apne pati Thakur vikram  Singh se kabhi baat nahi karti thi. Thakur Ranjeet Singh jinse saari riyaya kaampti thi. Woh bhi badi  bahu ke saamne  haath bhandhe kade rahte they.

Anjali ko apni maa ka ye vyvahaar kabhi samajh nahi aaya. Uski maa ka kabhi bhi kisi ne illaj nahi karwaya. Ye bhi woh kabhi nahi samajh paai. Sab ko pareshaan dekhkar Anjali badi bahu ko shaant karne chali gayi. Kisi naukar ki madad se roshandaan se haath dalkar darwaja khulwaya gaya. Jaise hi Anjali ander ghusi. Badi bahu ne paas rakha guldaan Anjali ke upar faink diya. Guldaan Anjali ke maathe par laga aur uske maathe se khun nikalne laga.

Anjali ghabrai nahi aur badi bahu ke paas jakar baith gayi. Badi bahu ne fir se kuch aur uthakar anjali par faikna chaha toh unki najar anjali ke maathe se nikalte hue khoon par padi.  Anjali ka khoon dekh kar badi bahu ka paagalpan achanak gayab ho gaya. Usne Anjali ko seene se laga liya aur dono maa-betiyan rone lagi. Thoda sambhalne ke baad Badi bahu khadi hui Anjali ka khoon saaf kiya aur us par patti baandh di. Anjali ne maa se poocha ki tumhe ye kya ho jaata hai. Badi bahu ne baat ko taalne ki bahut koshish ki lekin Anjali apni baat par adi rahi.  Anjali ne kaha ki maa mujhe hamesha se aisa lagta hai ki tum bahut kuch apne ander samaye hue ho. Aaj jab tak aap mujhe sab kuch sach nahi bataogi main mandap par nahi jaaongi aur ye shaadi nahi hogi.

Anjali ke bahut jidd karne par badi bahu ne bolna shuru kiya. Beta tum jaanti ho ki main bhi ek Thakur parivaar ki beti hoon. In Thakuron ki  haveliyaan jitni badi hoti hain. Inke aham bhi utne hi bade hote hain. Ye apni jhuti shaan ke liye kisi bhi hadd tak jaa sakte hain. Inki jhuti shaan ki aan-baan rakhne ke liye pata nahi kitno ne apne jeevan ko in haveliyon ki badi-badi diwaaron ki peeche dafna diya hai.  Main bhi inhi mein se ek hoon. Mera saara bachpan bhi inhi haveliyon mein bade aaram se gujra par jawaani mein kadam rakhne par pata chala ki mere pita ne apni jhuti aan-baan bajaye rakne ke liye Thakur Ranbeer Singh yaani tumhaare dadaji se kaafi karj le rakha tha.

Karj na chukka sakne ki haalat mein mere pita ne mera vivah Thakur Ranbir Singh ke bade bête Thakur Vikram Singh se kar diya. Jiske avej mein mere pita ka saara karj maaf kar diya gaya. Har ladki ki tarah maine bhi apne jeevan saathi aur vivah ke upraant apne jeevan ke liye bahut se sapne sajaaye they. Par shayad kismet ko kuch aur hi manjoor tha. Meri shaadi kartik maas ki poorinma ke din hui thi. Par pooranmaasi ka chaand mere jeevan mein roshne ke badle amavashya ki kaali chaya lekar aaya.

Main suhag ke sej par baithkar apne aane waale jeevan ke achche palon mein khoyi apne dulhe ka injaar kar rahi thi. Itne mein kisi ke pairon ki aahat sunkar main chaukanni ho gayi. Maine ghunghat nikal liya.  Kamre main ek chiraag  jal raha tha. Unhone kamre main aakar kamre ke chirag ko bujhakar roshni ko aur kam kar diya. Uske baad jo kuch hua usne meri shaari duniya badalkar rakh di. Mere saare kwabon ko chakna chur kar diya. Dulhe ki jagah unka chota bhai Thakur Ranjeet Singh hamaare saamne khada tha. Usne hamaare saath jabbardasti ki aur hamaari asmat ko lut liya.

Aur fir haamari saari kaynaat ko apne kadmon ke tale rondhte hue chala gaya. Hamen samajh mein nahi aa raha tha ki aisi haalat mein hum kya Karen. Kis se shikayat Karen aur kahan jaayen. Puri haveli mein hamaare dulhe Thakur Vikram Singh ka ata-pata nahi tha. Bahut himmat karke ye baat humne apni saas ko batai. Unhone sab kuch bhul jaan ki salah di. Ye baat hum apne ghar waalon ko nahi bata sakte they. Kyonki Thakuron ki dushmani ke baare mein hamen pata tha. Choti-choti baaton ke liye gharaane barbaad hote dekhe they humne. Phir itni badi baat. Kitna katle aam hota kitni laashe girti. Ye sab sochkar maine apne dil ke dard ko apne hi ander samet liya.

 Lekin shayad abhi kismet mein bahut kuch dekhna likha tha.  Maine jab ye baat Thakur Vikram Singh ko  batai toh woh sar jhukaye mere saamne kade rahe. Unhone ek baar bhi Thakur Ranjeet Singh ke khilaaf kuch nahi kaha. Usi din Thakur Vikram Singh meri najaron se gir gaye. Main soch kar hairaan thi ki ye kaisa Thakur hai jo apni patni ki raksha bhi nahi kar sakta.

Main bhetar hi bheetar ghutati rahi. Mere andar krodh ki jwala bhadak rahi thi. Lekin main kuch na kar saki. Mujhe haveli ke ek kone mein band kar diya gaya. Main kisi se bhi nahi mil sakati thi. Naukar chakar mere paas nahi aa sakte they. Main jaise taise apne aap ko sambhal rahi thi. Par fir Thakur Ranjeet Singh ne mujh par hamla kar diya aur main lut ti chali gayi. Aisa tab tak hota raha ki jab tak tum mere garbh mein nahi aa gayi. Jis din Thakurain ko viswas ho gaya ki main maa ban ne wali hoon. Us din ke baad se Thakur  Ranjeet Singh ne mere paas aana chod diya. Ye sabkuch mere pati Thakur Vikram Singh aur Thakuraain ki rajjamandi se ho raha tha.

Mere maa banne ki khabar sab jagah faila di gayi. Aur saari haveli aur saari riyasat mein khusiyaan manai jaane lagi ki Thakur Vikram Singh baap  ban gaye hain. Ek taraf haveli mein khusiyan manai ja rahi thi aur Thakur Vikram Singh chaati phulaye ghum rahe they. Aur doosri ore mere tann mann mein aag jal rahi thi. Aur main apne jeevan ko khatam karne ka tarika dhundh rahi thi. Par tabhi mujhe tumhara khyal aaya ki apne aap ko khatam karke main tumhara jeevan bhi khatam kar rahi hoon.

Mere ander ki mamta jaag uthi. Aur maine aatamhatya ka vichaar chod diya. tumhaare garbh mein aate hi mujhe haveli mein poora sammaan milne laga. Mera poora khyal rakha jaata. Beesiyon naukar chakar meri chaakri mein lage rahte. Mujhe samajh mein nahi aa raha tha ki ye sab kya ho raha hai. Kal tak toh in logon ne mera jeevan tabah kar ke rakha hua tha. Aur aaj mujhe aisa samman mil raha hai. Lekin jab mujhe sachchi ka pata chala toh mere pairo tale jameen khisak gayi. Mere upar se aasmaan hat gaya. Meri saanse band hone lagi jaise mere ander vayu ka sanchaar bandh ho gaya aur mein butt si bani rah gayi.

In Thakuron ne apni jhute aham aur jhuti shaan ke liye     mera jevvan barbaad kar diya.  Thakur Vikram Singh janam se napunsak they. Meri shaadi ek napunsak se hui thi. Bachpan se jawaani tak toh Thakuron ne ye baat chupa li. Par jawaani mein ye baat kaise chupe. Iska koi bhi tarika unhe suje nahi raha tha.  Aur fir iss chausar ka mohra mujhe banaya gaya. Vivah toh ho gaya par ek napunsak ko santaan kaise hogi. Isliye unke chote bhai Thakur Ranjeet Singh ko mere kamre main bejha gaya.

Aur Thakur Ranjeet Singh ki aulad ko Thakur Vikram Singh ki santaan batakar Thakur Vikram Singh ka sach duniya se hamesha ke liye chupa liya gaya. Thik usi din se jab bhi poorinma ki raat aati hai. Toh chaand ki chandni mere saare tann-mann ko chalni kar deti hai. Mujhe apne saath hue viswasghaat par dukh hota hai.  Main apne saari sapno aur khawabo ko apne saamne tuta aur bikhra hua dekhti hun. Aise mein mera dimaag kaabu mein nahi rahta aur main paagal si ho jaati hun. Badi bahu apni kahaani sunakar phut-phut kar rone lagi.

Anjali ko jab apne aur apni maa ke sach ka pata chala toh uske hosh ud gaye. Woh jinko aaj tak apna pita maanti aai thi woh uske pita nahi they. Usko aaj apna astitva hi jhoota lag raha tha. In Thakuron ne uski maa ko hi nahi use bhi dhoka diya tha. Woh samajh nahi paa rahi thi ki woh kis baat ka jayada dukh manaye apni maa ke sach ka ya apne sach ka.  Woh chupchap jakar shaadi ke mandap par baith gayi.  Logon ne poocha ki badi bahu kahan hain toh Anjali ne kaha ki maa ki tabiyat thik nahi unhe rest karne do. Uska vivah sampann ho gaya. Woh jaane se pahle maa ke paas aashirwad lene aai. Woh maa se gale lag kar bahut roi, Use apni maa ke liye bada bura lag raha tha.  

Jaate hue Anjali ne sabse aashirwad liya lekin Thakur Vikram Singh aur Thakur Ranjeet Singh ko grena kin ajar se dekha aur unka bagair aashirwad liye doli mein baith gayi.

Shayad Thakur Vikram Singh aur Thakur Ranjeet Singh ko samajh mein aa gaya ki Anjali ne unse aashirwaad kyon nahi liya.

Idhar Anjali ki doli uthi udhar badi bahu ke praan pakheru ud gaye. Sirf ek Anjali hi thi jiske liye woh  aaj tak ji rahi thi.

***************