Saturday, March 10, 2012

Dhandhewali

Rama apne haathon ki rekhaaon ko dekh rahi thi.  Usske chehre par ek ajeeb si muskurahat thi jaise ki rekha banaane waale ke upar koi kataksh kar rahi ho.
Itne mein Champa aa gayi aur boli, “ Kyon, aaj phir kuch naya hua kya?” 
Rama ne pucha, “Aisa kyon pooch rahi ho?”
Champa boli, “Jiji itne saalo mein itna to jaan hi chuki hun ki kab aur kyon tum apni haath ki rekhaon ko dekhti ho.” Rama ne kaha, “Haan, aaj phir kuch naya hua.  Pichle kuch dino se ek naya grahak aa raha hai, aata hai, baatein karta hai aur chala jaata hai.  Koi pagal shayar lagta hai. Mujh par hi shayari likhta hai. Aur mujhe hi sunata hai.  Pahle to bada gussa aata tha, ki karta warta kuch nahin phir apni raat aur paise kyon barbaad karta hai. Par ab mujhe bhi woh achcha lagne laga hai. Uski shayari aur uski baaton mein kuch aisa ras hai ki raat kab guzarti hai pata hi nahi chalta.  Ab toh mujhe bhi raat ka intjaar rahne laga hai. Kuch ghanto ke liye hi sahi main is narak se door kisi doosri duniya mein chali jaati hoon. Main bhi apne aap ko ek mukammal aurat samajhane lagti hoon. Lekin subah hote hi phir apne aap ko iss badnaam basti mein paati hoon. Lekin aaj kya hua jiji? Aaj.. Aaj usne mujhse shaadi ka prastab rakha. Shaadi aur ek tawayaf se. Bas isi liye aaj main apni rekhaoon main apni kismet ko dhundh rahi hoon. Twayaf ki shaadi uski grahasti us ka ghar, ghar ka aangan, ek parivar kya ye ek majaak nahi hai?
Kyoinki twayaf ko iss tarah ke sapne dekhne ka hak nahi hota. Ghar ke diye aur mehfil ki shama main bahut bada farq hota hai. Ye main jaanti hoon aur isiliye apni kismet ko dhundh rahi hoon. Taaki milne par kose shakun Ki sukh ke woh pal jo kisi tawayaf ke jeewan main aa nahi sakte. Toh fir kyon aise sawal saamne laakar khade kar deti hai. Jinke koi jawab nahi hote. Rama kab in badnaaam galiyon main aai kab Rama se Ramabai ban gayi shayad ab use yaad bhi nahi.
Ek din ki baat hai Ramabai hamesha ki tarah subah-subah mandir jaa rahi thi. Khote se kuch door nikali thi ki achanak use kisi bachche ke rone ki awaaj aai. Usne idhar-udhar najar daudai par aas-paas koi na dikhai diya. Dheere-dheere aawaj aur badne lagi. Tabhi Ramabai ki  najar kudedaan par gayi. Kude ke  dher main ek bachcha kapde main lipta pada tha. Ramabai ne mudkar jaana chaha par bachche ki rone ki awaaj ne use jaane nahi diya. Uske ander ki mamta jise usne yauvan main kadam rakhte hi dafna diya tha. Aaj achanak jag uthi. Aur kabar se bahar aane ke liye chat-patane lagi.
Na chahte hue bhi usne bachche ko utha liya. Aur chaati se laga liya. Shayad aaj fir kisi bin byahi maa ne apni ijjat ko bachane ke liye apne najaayaj  bachche ko kude main faink diya. Ramabai bachche ko ghar le aai. Lekin bachche ka kare kya? Use samajh main nahi aaya.
 Sabke kahne par woh  police main report likhwane chal padi. Par police main report likhwana hi bada muskil kaam tha Ramabai ke liye. Iske liye use kitne jaddojahad karni padi  ye toh uska khuda hi jaanta tha. Pahle toh report likhen se  police ne saaf mana kar diya. Ek policewala bola pahle toh raand ne bachcha jana aur ab kisi aur ka kahkar yahan chodne aai hai. Jab aish karti ho paisa kamati ho. Tab dhyan nahi aata ki bachcha hoga toh uski jimmedhari kis ki hogi.

Ramabai ne bahut haath-paair  jode par police ne uski report nahi likhi. Aakhirkaar yahan bhi uska dhandha hi kaam aaya. Koi policewala uska grahak nikla aur uski madad se hi report likhi gayi. Aur police bacheche ko kisi anath aashram main rakhne ke liye tyar ho gayi par use main aath-das din ka samay lag jayega  isliye police ne Ramabai ko kaha ki jab tak iss bachche ko anath aashram main rakhne ka intjamm hota hai tum ise apne paas hi rakho.
Ramabai bachche ko ghar le aai. In aath-das dino main Ramabai ko bachche se itna moh ho gaya ki uska mann baigair uske lagta hi nahi tha.  Ramabai ko jis din iss baat ka ahsaas hua ki woh maa ban ne wali hai. Usne usi din apna operation karwa liya. Woh nahi chahti thi ki uski kokh se koi janam le aur iss mahaul main aankhe khole. Kyonki woh nahi chahti thi ki agar uski ladki ho toh woh kisi aur ka bistar garam kare aur ladka ho toh kisi aur ladki ka dalla banker apna jeewan gujar de.
Par aaj itne saalon ke baad aaj fir wahi sawal uske saamne khada ho gaya uski godh main ek ladka hai woh uska kya kare. Who yah soch rahi thi, ki kis ki salah le itne main shayar uske saamne aakar kada ho gaya. Usne shayar se kaha ki aaj main tumhe ek kahani sunati hoon. Aur usne paatr badalkar use kahini suna di aur use rai dene ke liye kaha. Shayar ke rai ke anusaar ek raat Ramabai bachche ko lekar chupchap shahar chod kar chali gayi. Aur bachche ka palan poshan karne lagi. Ramabai iss bachche ke karan fir se Ramabai se Rama ban gayi.
Ramabai ne pichle dino main bahut paisa kamaya tha. Kaafi dino tak toh usi se kaam chalta raha. Par aage kya karti use koi bhi kaam nahi aata tha. Saare jeewan main ek hi toh kaam kiya tha. Lekin ab woh us kaam ko karna nahi chahti thi. Usne bache-kuche paiso se ek silai machine le li. Aur silai karna seekh liya. Ab woh silai karke apna aur apne bachche ka pate paalne lagi. Bachcha bada hone laga. Silai se pura nahi padta tha. Toh usne logo ke gharon main bhi kaam karna shuru kar diya. Din ke samay woh ghar ki saaf-safai aur bhandi-bartan ka kaam karti aur raat ko logon ke kapde seeti.
Dheere-dheere samay betne laga. Bachcha bada hone laga. Rama ne use ek school main dalwa diya. Bachche ka naam arun rakha. Aur usse ye bataya ki uske pita ka accident main dehant ho gaya hai aur khud ek vidhwa ki tarah  jeevan bitane lagi.  Arun bada ho gaya. Dono maa bête badi khusi se rahte they. Rama ki kurbaani rang lai. Arun ek bade sarkaari pad par kaam karne laga.
Rama ab arun ke liye ek ladki ki talash karne lagi. Ek din Arun ek ladki Aasha ko ghar lekar aaya. Usne Aasha ko Rama se milwaya. Rama samajh gayi ki Arun Aasha se pyar karta hai aur use se shaadi karna chahta hai. Rama ne Arun se Aasha ke maata-pita se milne ki ichcha jahir ki. Arun bola thik hai maa aate itwaar ko Aasha ke papa tumse milne aayenge. Rama ne saare ghar ki safai ki. Kuch pakwaan banaye aur fir Aasha ke papa ka intjaar karne lagi.
Aasha ke papa aaye. Arun ne apni maa ko unse milaya. Rama unhe dekh kar bauchakki rah gayi. Aasha ka papa wohi shayar tha. Rama ko dekhte hi bola Ramabi tum ! Aur ye bachcha kya wohi bachcha hai. Aurn hairaan sa unhe dekh raha tha. Shayar bola abhi bhi dhanda karti ho ya chod diya.  Ye shaadi nahi ho sakti. Ye kahka shayar wahan se nikal gaya.
Aurn hakka-bakka rah gaya. Meri maa ek dhandhewali, ye sunkar woh apne aap ko aur Rama ko kosne laga. Toh main ek dhandewali ka ladka hoon. Main ek dhandhewali ki kamai se pala bada, ek dhandhewali ke haatho se niwale kha kar main bada hua.  Chii ! Ye sochkar hi mujhe apne aap se ghin aa rahi hai. Arun bole jaa raha tha. Rama khadi-khadi sune ja rahi thi. Tu ne  mera jeewan barbaad kar diya. Iss se toh achcha hota ki  tu mujhe bachpan main hi  maar deti. Kam se kam aaj ye badnaami toh na sahni padti.  Tu ek dhandewali hai thu hai tujh par thu… dhandhewali.
Arun thuk kar ghar se nikal gaya.
 Rama fir se anpne haathon ke rekhaoon ko dekhne lagi.
*************

No comments:

Post a Comment