Miss Wrong Number

Main bahut disturbed tha. Hamesha ki tarah apni tension ko release karne ke liye maine Aditi ko phone kiya. Par tension mein phone kahin aur mil gaya.

Ghanti baji saamne se aawaj aai, “Kis se baat karni hai?”

Maine kaha ki baat toh tumse hi karni thi par shayad phone tumne nahi kisi aur ne utha liya hai.

“Par phone toh maine hi uthaya hai.”

“Fir aise kyon pooch rahi ho ki kis se baat karni hai?”

“Arre  bhai, mera matlab hai kaun bol raha hai?”

“Toh pahle poochna chahiye tha toh main bata deta ki main bol raha hoon.”

“Thik hai batao kaun bol raha hai?”

“Arre abhi toh bataya main bol raha hoon...”

“Main kaun?”

“Ab meri awaj bhi bhool gayi, jo pooch rahi ho!”

“Haan bhul gayi ab batao kaun?”

“Arre kya hua tumhaari yaaddasht ko? Kahin tumhara ghutna toh nahi takraya aur tumhaare dimag par chot lag gayi ho.”

“Ha ha ha… bahut achcha joke tha. Ab main phone rakh doon ya tum bata rahe ho ki  tum kaun bol rahe ho aur tumhne kyon phone kiya hai?”

“Lagta hai ki paara chadha hua hai. Kisi se lad kar baithi ho kya?”

“Nahi lad kar nahi baithi hoon. Ab ladne waali hoon.” 

“Haan ladne ke allawa tumhara kaam bhi kya hai. Subah office mein ladi ab ghar par lado. Abhi tak gussa shaant nahi hua. Thanda paani pi lo. Do-chaar lambi  saanse lo fir thande dimag se socho pata chal jaayega ki galti tumhaari thi. Aur fir mujhe sorry kaho. Ab main phone rakh raha hoon. But I am waiting for your call. Otherwise aadhe ghante baad phone karunga.”

Ye kehkar maine phone rakh diya. Aadhe ghante baad maine redial ka button dabaya.

Aur fir ghanti baji.

Wahan se awaaj aai, “Kaun?” 

Main bola, “Abki baar theek question poocha ki kaun?”

“Achcha tum… Main tumhaare hi phone ka intezaar kar thi. Pahle toh aadhe ghante tak bad-bad karke mere dimag ki band bajai fir aadhe ghante baad phone karunga, ek dhamki aur de di. Ab tum batao tukhaare button thik-thak  hain ya fir buttono mein rataundi ho gayi hai. Mere toh ghutne par chot nahi lagi  par lagta hai tumhaari adi par chot lagi hai. Jo tumhe amnesia ho gaya hai. Jo number thik se yaad nahi. Maine toh thanda paani pi liya ab tum thanda paani piyo nahi apne sar par daalo. Ab main phone kaat rahi hoon. Ab tum mujhe sorry kaho abhi isi waqt. Tumhne pahle bhi wrong number milaya tha aur ab bhi wrong number milaya hai. Say sorry woh jor se chil laai. Mere muh se tapak se nikala “sorry” aur usne phone kaat diya.

Uske phone rakhte hi mujhe ek jhatka laga. Maine phata-phat caller ID mein number dekha. Mujhe apni galti ka ahsaas hua. Ab socha phir phone karun ya nahi. Lekin maine phone kiya.

Fir ghanti baji, wahan se awaj aai bolo “sorry”.

 Maine poocha ki tumhe kiaise pata chala ki main bol raha hoon.

 Tum ek samajhdaar insaan lagte ho.

Woh kaise?

Kyonki samajhdaar insaan apni galti ka ahsaas hone par sorry kahne mein der nahi lagate.

Thank you.

Waise tum bhi kaafi samajhdaar lagti ho.

Woh kaise?

Kuch toh tumhaari baaton se jhalkta hai aur doosra, ek samajhdaar insaan hi doosre samajhdaar insaan ko samajh sakta hai. Lekin phone kisi aur ka bhi toh ho sakta tha. Phir kaise tapak se bol diya ki sorry bolo.

Apne jaisa bewkoof samajha hai. Mere ghar mein caller Id hai.

Oh ! Main waise hi impressed ho gaya.

Kya matlab?

Kuch nahi. Woh main jara aditi se naraaj tha. Isliye uska phone mila raha tha. Mere phone mein signals nahi aa rahe they.  Isliye landline se phone kiya. Tension mein galat number dab gaya. Itne mein mera phone bajne laga. Ek minute mera mobile baj raha hai.  Erre aditi ka phone hai. Main tumse baad mein baat karunga. Ok bye. Fir maine phone kaat diya.

Hello  aditi. Kya hua gussa shaant hua. Chalo chaodo jo hua mitti daalo. Pata hai aaj tumhaare chakkar mein main kisi aur se bhid gaya. Aditi ne poocha kaun tha?

 Erre tha nahi thi.

Achcha kaun? Kya naam tha? Kahan mili?

Naam toh pata nahi, poocha bhi nahi aur kahin mili nahi. Phone par baat hui thi. Wrong number tha. Fir maine use saara kissa suna diya. Itne mein mera land line phone bajne laga. Maine number dekha. Erre ye toh uski ka number hai.  Aditi boli tum baat karo main tumhe baad mein phone karungi. Par iss baar naam jaroor pooch lena. Maine kaha aachcha pooch loonga. Maine phone uthaya. Erre tumhne kaise phone kiya.

Tumhe kuch yaad dilana tha.

Kya?

Thodi der pahle tumhne phone kiya tha.

Haan kiya tha.

Kyon kiya tha?

Sorry bolne ke liye.

Haan toh main wait kar rahi hoon.

Kis chees ka?

Tumhne abhi tak nahi kaha.

Kya nahi kaha.

Wahi jo kahne ke liye phone kiya tha.

Phone toh tumhne kiya hai.

Abhi nahi pahle.

Achcha toh isliye aap ne mujhe phone kiya.

Haan.

Sach bolo. Kahin mujhse baat karne ka mann toh nahi kar raha tha.

Nahi toh.

Phir nahi kahunga.

Kyon?

Abhi mood nahi hai. Aur main doobara phone karne ka mauka nahi khona chahta.  Khair mera naam anuraag hai aur tumhara.

Raagini.

Ye thi hamaari pahli mulakaat.

***********

Anirudh ya Henry

Anirudh aaj fir se ghar se tension mein nikala. Ye bhi koi jindagi hai. Ghar se office aur office se ghar, no koi excitement no koi change, bilkul monotonous. Aisa jaise kisi taalab ka thehra hua paani jismein koi hal chal nahi.  ruka hua hai kisi rahgir ke intjaar mein, ki koi aaye aur ek pathar uchachal kar fainke usmein, toh kuch der ki liye sahi uthal-puthal ho jaaye usmein.   ya fir baitha rahata hai intjaar mein  aankhe bichaye aur  haath failaye hue un baadlon ke, jo uske upar se gujarte hue kabhi toh us par maharbaan ho jaayen. Aur fir se woh ek baar bhar jaaye upar tak aur chu le un kinaron ko jinse mile hue ek  jamana bit gaya hai. aur gar bhar bhi na paaya toh bhi kuch samay ke liye hi sahi ek badlaw aa jaye uske jeewan mein.

        meri hi galti hai maine hi gharwalon ki baat maani hi kyon? Achchi bhali us ki naukri inke bahkaave main aakar chod di aur gale main sapna naam ki ghanti baandh li. Aur apne jeewan ke sapne ka gala ghot kar use chakna chur kar diya. Aaj us main maje kar raha hota, discos, pubs, scooba diving, para climbing aur jaane kya-kya? Saare dost mere wahin toh hain. Aur main aaj jindagi ki iss boring gaadi ko kheench raha hoon. Ab opportunity roj-roj thode hi na milti hai.?

Kaas ek baar fir se mauk mil jaaye toh sabkuch chod kar bhag jaoon. Anirudh is uded bun mein laga tha ki achanak uski bike ek tark se takra gai aur Anirudh ka accident ho gaya. Anirudh ko hospital mein le jaya gaya. Anirudh  ko jab hosh aaya toh usne apne  aas-paas khade logon ko dekha par kisi ko bhi nahi pahchn paya.

Anirudh pareshaan hone laga ki  woh kahan hai. Uske aas-paas ye firangi kya kar rahe hain. Woh sabko ajeeb nigahon se dekh raha hai aur iss bheed mein kisi apne ko dhundh raha hai. Hello Henry, how are you? How are you feeling? What happened to you? Are you all right? Anirudh soch raha hai ki ye log kaun hain? Aur usko Henry kyon bol rahe hain? Yeh budda aur budiya jo use pyar se sahla rahen hain ye kaun hain? Aur woh is samay kahan hai?

Usne doctor se poocha where is he? Who are these people? Doctor ko laga ki accident ki wajah se Henry kuch alag behave kar raha hai. Doctor ne kaha ki you are in hospital Henry. You have met with an accident. But don’t worry you will recover soon.  Henry ! Who is Henry? My name is Anirudh sharma where are my parents, my wife and my daughter.

What are you talking about? Here are your parents mr. And mrs. Symonds and your wife and daughter. What are you talking? You have not been married so far and Anirudh who is Anirudha sharma? Ab ise Henry bola ya Anirudh iske dimag ne kaam karna band kar diya aur ye irritate hone laga aur usne apna sar pakad liya. Doctor ne  use aaram karne ki hidayad di aur sabko jaane ke liye kah diya. Henry ke parents mr. And mrs. Symonds ghabra gaye. Doctor ne unhe samjhaya ki dimagi chot hai aur kabhi-kabhi aisa ho jata hai.

Humen kuch test karne padenge. Uske baad hi hum kuch kah sakte hain. Aapko toh khush hona chahiye ki aapka ladka bach toh gaya. Ab tak sab thik hai aur aage bhi sab thik hi hoga. Idhar sab ke jaane ke baad Anirudh ne nurse se poocha ki what is the name of this hospital and where is it situated. She replied this franklin hospital of washington dc. Ye sunte hi Anirudh ke hosh ud gaye use apne kaano par viswas nahi hua. Woh apni purani yadoon main kho gaya. Usne ek sire se sochna shuru kiya ki uske saath kya hua par koi bhi kinara use us tak nahi pahunchata tha. Use kuch samajh main nahi aa raha tha ki ye sab kya ho raha hai aur woh yahan kaise pahuncha aur ye sab log kaun hai aur use Henry kyon kah rahe hain. Ye sochte-sochte use neend aa gayi.

 agle din morning mein, Anirudh utha aur washroom gaya usne jaise hi apna chehra shishe mein dekha woh jor se chillaya uska shor sunkar nurse daudkar kamre main aai aur seedhe washroom mein pahunchi aur boli what happened? Anirudh bola what happened to my face? Nurse boli nothing its just a scratch. We have stitched it. There was a deep cut but don’t worry these stitches will dissolve in few days. You won’t find any scar here. Anirudh bola iam not talking about the cut. Iam talking about the face. This is not mine. Where is my face? Have you done the plastic surgery?

Nurse hansne lagi aur wahan se chali gayi. Henry ki saari reports normal aa rahi thi. Doctor pareshaan they ki Henry kisi ko pahchaan kyon nahi raha hai. Henry ne unhe samjhane ki koshish ki woh Henry nahi hai uska naam Anirudh sharma hai. Woh ek indian hai aur india mein rahta hai uski ek family hai jo india mein hi rahti hai. Woh yahan kaise aaya use nahi pata. Lekin doctor uski in baaton ko samajh nahi paa rahe they ki kya ho raha hai. Henry apne logon ko kyon nahi pahchaan raha aur jin logon ki ye baat kar raha hai unke saath  Henry ka kya rishta hai.

Mr. And mrs. Symond ne bataya ki woh kabhi bhi india nahi gaye hain aur Henry ka koi bhi dost indian nahi hai aur Henry ka door-door se bhi koi  wasta india se nahi hai. Anirudh bhi ab thak chukka tha sabko samjha-samjha ke par koi bhi uski baat par yakin nahi kar raha tha. Thak haar kar usne ek chuppi saadh li. Use samajh nahi aa raha tha ki woh in sab logon ko kya samjhaye aur kaise samjhaye par sach toh ye tha ki use khud bhi abhi tak samajh nahi aa raha tha ki asal mein ho kya raha hai.

Isi beech ek din Anirudh ne sab se bach kar apne ghar india mein phone kiya aur apne papa se baat karne ki koshishi ki. Wahan india mein Anirudh ke papa ne use badi jor se daant lagai ki iss tarah ka ganda majaak karte hue tumhe sharam aani chahiye. Hamaara beta toh hospital main admit hair aur coma mein pada hai. Aur tum kah rahe ho ki tum mere bête bol rahe ho. Khabardaar doobara mere ghar mein phone kiya toh.

Anirudh aur bhi pareshaan ho gaya ki agar Anirudh india mein hai toh woh yahan jo us mein hai kaun hai? Usne ab sab kuch samay par chod diya aur jaise doctor kahne lage chupchap karne laga. Kuch hi dino mein doctors ne use discharge kar diya aur woh Henry banker Henry ke ghar aa gaya. Henry kaafi rich tha. Henry ka life style Anirudh se kaafi different tha. Kuch aisa hi jaise ki Anirudh ne hamesha se kalpna kit hi. Anirudh dheere-dheere Henry mein dhalne laga aur uski dincharya ko apnane laga.

Parties, disco, pubs, scooba diving, horse riding aur woh sab kuch jo woh kabhi karne ki sochta tha. Life jeena ka maja aane laga. Aakhirkaar jo woh hamesha se chahta tha use mil gaya tha. Life ek jannat ki tarah lagne lagi thi. Woh bahut khus tha aur life ko enjoy kar raha tha.  Par kab tak har roj gaajar ka halwa nahi khaya ja sakta. Kuch samay ke baad use ye life bhi boring lagne lagi.  Western culture morden hone ke saath-saath wahan ki life  bahut fast bhi hai. Woh sabhi indians jo indian culture mein pale-bade hote hain is atmosphere mein adjust nahi ho paate.

 ab dheere-dheere Henry Anirudh ko miss karne laga. Use yahan us mein  logon ka itna practical hona chubne laga. Jo kabhi indians ko emotional fool kahta tha. Apne ird-grid emotions ko dhundhne laga. Use lagne laga ki  kaash woh Anirudh hi hota toh achcha tha. Wahan india mein saare rishte kitne apne lagte hain. Ghar walon ka caring attitude doston ka apnapan toh yahan dhundhne se bhi nahi milta. Uske saare ke saare shauk pure ho gaye they. Ab use lagne laga tha ki woh ye jindagi nahi jeena chahta tha bas use apni  in ichachaoon ko pura karna tha.

Life toh use india wali hi chahiye thi jahan woh jab chahe kisi bhi dost ya rishtedaar se mil leta tha. Kisi se appointment nahi leni padti thi. Jahan pados ke verma ji subah ka akbaar babuji ke saath padne aate they aur kam se kam do-teen chai ke baad hi uthana, woh maa aur sapna ka sabji waale ke saath ek-ek tamatar ki liye bahas karna aur dhaniya aur mirch toh sabji ke saath free milti hai kahkar apne beg mein dalwa lena, woh nukkad ke pappu tea stall ki chai aur shaam ko doston ke saath carrom board khelna  in sabhi choti-choti baaton jismein kahin jindagi ki dherron khusiyan chupi thi jinko woh aaj tak najar andaaj karta chala gaya tha ko miss karne laga tha. Woh soch raha tha ki kash usne kabhi iss jeewan ki kaamna na ki hoti toh kitna achcha hota. Shayad uski inhi ichachaon ko pura karne ke liye bhagwaan ne uske saath ye khel khela hai.

Henry in sabhi  baatoon ko soch raha tha aur pastah raha tha ki kash woh Anirudh hi hota toh kitna achcha hota ki tabhi alaram bajne laga. Aur ek awaj aai, Anirudh utho kab tak sote rahoge. Suraj chad aaya hai. Office jana hai ya nahi. Chai thandi ho gayi hai pahle hi teen baar garam kar chuki hoon.

Anirudh ne aankhe kholi saamne sapna khadi thi. Anirudh ko samjhte der na lagi ki woh ek sapna dekh raha tha. Usne apni sapna ka haath kheencha aur bahon mein le liya aur bola aaj bolo toh chutti kar loon.

******************

Pyar ki ek kahani

  Un dino ki hai jab hum collage main pada karte they. Padna kahan mauj masti, gumna-firna jyada hua karta tha aur saara kharcha uthate they anwar  hussain.  Anwar hussain khandani rahis they. Fijul kharchi  unki aadat thi. Anwar hussain aashiq mijaaj they. Ladkiyon ke saath unhe ghumna achcha lagta tha par woh unhe kabhi bhi gambhirta se nahi lete they. Hamaare hi collage main ek ladki padti thi aaysha khanam, woh nihayat hi sharif, sundar, sharmili aur ek bahut hi jahin ladki thi.

Aaysha ke sundarta ke charche collage main aam they. Anwar ke kaano main jab aaysha ki sundarta ki baat pahunchi toh woh usko paane ke liye lalait ho gaye. Anwar ne aaysha se milne ki koshish ki par aaysha ne milne se saaf taur par mana kar diya. Aaysha, anwar ke kisson se waqif thi. Aisa pahli baar hua tha ki jab kisi ladki ne anwar ko milne se inkaar kiya ho. Iss ek na ne anwar ke aham ko badi thes pahunchai.

Anwar ke dostoon ko jab pata chala toh sab ne anwar ka bada majaak udaya. Anwar ne aaysha ko paana ek jidd bana li. Aur apne doston se shart laga li ki woh kuch hi mulakaaton main aaysha ko apna bana lega.  Anwar ne shart jeetne ki liye apna jhal bhichana shuru kar  diya. Sabse pahle anwar ne ye pata lagaya ki aaysha ko kya pasand hai aur woh kahan kahan jaati hai.

Aaysha har itwar ko peer baba ki majaar par jaya karti thi. Iss baar jab majaar par pahunchi toh kya dekhti hai ki anwar  pahle se wahan pahuncha hua hai. Aaysha ne anwar ko najar andaaj karne ka bahana banaya. Aur us par apni najar tika di ki woh yahan kyon aaya hai aur kiske saath aaya hai? Thodi der main aaysha ko pata chala ki woh apni dadi jaan ko lekar aaya tha.

Anwar ne ab koshish ki woh din main ek-aadh baar aaysha ki najaron ke saamne se jaroor gujre. Par woh aayasha se baat karne ki bilkul bhi koshish nahi karta tha. Ab woh apni saari classes attend karne laga. Class mein professor ke sawalon ke jawab deta aur discussion mein bad-chad kar hissa leta. Jab aaysha library mein jaati toh anwar use pahle se wahan baitha hua milta. Ab dono ka aamna-saamna kabhi canteen, kabhi library, kabhi market aur kabhi peer baba ki majaar par ho jaata. Aaysha hamesha ki tarah use najar andaaj kar deti aur anwar bhi baigair baat kiye chal padta.

Anwar ne ladkiyon ke saath ghumna firna band kar diya. Anwar ke ander aaye changes ko har koi notice karne laga. Aaysha ko bhi laga ki shayad anwar badal gaya hai.  Ek din aaysha ne anwar ko ek anaath aashram mein dekha, aaysha is anaath aashram mein mahine main ek baar jaroor aaya karti thi toh use laga ki anwar uska peecha karte hue yahan aaya hai. Usne anwar ko buri tarike se daant diya. Aaysha boli ki mujhe lagta tha ki  tum badal gaye ho par kutte ki poonch kabhi seedhi nahi hoti. Tum yahan bhi mera peecha karte aa gaye.

Anwar baigair kuch bole wahan se nikal gaya.  Aashram ke incharge ne aaysha ki naraajgi ki wajah poochi toh aaysha ne anwar ki maujudgi par aitraaj jaahir kiya. Tab incharge ne kaha ki nawab sahib toh pichle 15 saalon se har saal yahan aate hain. Aur unhone iss aasharam ke liye bahut kuch kiya hai. Aur agar main ye kahun ki ye aashram unki daya par hi chal raha hai toh bhi koi atishyokti nahi hogi. Ye sab sunkar aaysha ko apne bartav par bada afsoosh hua.

Aaysha ne agle din collage pahunch kar apne bartav ke liye maafi maangi. Aur dosti ka haath aage badaya. Ab dono ki mulakaaten badne lagi.  Ab dono collage mein ek saath dikhai dene lage. Dono ghanto tak ek-doosre ke saath baate karte rahte.  Aaysha ko apne jhal mein fansane ke liye pyar ka natak karte-karte  anwar sach main aaysha se pyar karne laga. Usne paya ki aaysha ek sachchi aur nek ladki hai. Anwar jo ki aaysha ki  bahari khubsoorti ke wajah se aaysha ki taraf aakarshit hua tha. Usne paaya ki aaysha bhitar se aur bhi khubsoorat hai.

Anwar ab aaysha se mile baigair rah nahi paata tha. Jab bhi woh aaysha ke saath hota toh use lagta ki woh kisi jannat mein hai. Anwar ki iss sachchai se door anwar ke doston ko laga ki anwar toh shart jeet wala hai. Isliye unhone aaysha ko anwar ki iss shart ke baare main bata diya. Aaysha ka dil tut gaya kyonki woh bhi ab anwar ko chahne lagi thi. Usne anwar ko bahut bura-bhala kaha aur use se apni dosti tod di. Anwar ne aaysha ko samjhane ki bahut koshish ki. Par aaysha ne kuch bhi sun ne se inkaar kar diya. Usne anwar ko apni safai pesh karne ka koi bhi mauka nahi diya.

 Anwar ne aaysha se milne ki bahut koshish ki par woh anwar se nahi milti thi. Anwar aur aaysha dono hi bahut dukhi they. Anwar ne apne saare doston se milna chod diya aur aaysha akele mein baithi aanshu bahati rahati.  Isi dauraan aaysha ki shaadi ek anwar kureshi naam ke ladke se pakki ho gayi.  Aaysha ka gam aur badd gaya ki woh pahle hi anwar ko bhula nahi paa rahi thi aur uske dulhe miyan ka naam bhi anwar hi tha. Use lag raha tha ki uska gam kabhi bhi kam nahi hota uske sohar ka naam uski  puraani yaadon ko kabhi bhi bhulane nahi dega.

Aaysha ne apni shaadi ka pahla card anwar ko diya aur boli tumhne mera dil toda hai mere viswas ko thes pahunchai hai. Ab main tumhari wajah se  kabhi bhi kisi par viswas nahi kar paaoongi. Tumse meri sirf ek gujarish hai jo tumhne mere saath kiya kisi aur ko na batana warna logon ka pyar se viswas uth jayega. Anwar ne aaysha ko fir se apni sachchi mohabatt ka viswas dilane ki koshish ki lekin aaysha ne uski ek bhi baat nahi suni aur wahan se chali gayi.

  Jab anwar ke doston ko iss baat ka pata chala toh unhe bada dukh hua ki unki wajah se unke sabse achche dost ki duniya lut gayi. Lekin ab tak bahut der ho chuki thi. Shaadi ke tyariyan hone lagi thi. Lekin fir bhi unhone ek chance lene ki sochi. Aur woh sab ke sab aaysha ke ghar usko samjhane chal pade.  Aaysha ke Ghar pahunchkar unhone aaysha ko anwar ki shachi mohbaat ka viswas dilaya. Unhone  kaha ki ye sach hai hum logon mein shart lagi thi. Lekin tumse milne ke baad anwar sach mein badalne laga. Tumhaari sirat ka us par aisa asar hua ki woh tumhare pyar main bahne laga aur tumse pyar kar baitha. Aur ab humen dar hai ki tumhaari shaadi ke baad hum anwar ko kho na baithe.

Aaysha unki baaten sunkar pareshaan ho gayi aur rone lagi. Usne kaha ki maine toh gusse mein aakar shaadi ke liye haan kar di thi. Par ab kuch nahi ho sakta main apne ammi-abba ko dukh nahi pahuncha sakti. Aur koi bhi galat kadam uthakar Unhe ruswa nahi kar sakti. 

Tum logon ne mujhe sachchi batakar  mere liye jeena aur bhi doobar kar diya hai. Iss se toh achcha tha ki  main anwar ko hamesha hi dokhebaaj samajhti rahti. Ab toh main kisi ke saath bhi nayay nahi kar sakti. Na toh anwar hussain ke saath jisse main itna pyar karti hoon aur na apne hone wale dulhe anwar kureshi ke saath jiske saath mujhe apna aane wala jeewan bitana hai. Kyonki uske saath rahte hue bhi main ab anwar ko nahi bhula   paaongi.

Aaysha ka faisla sunkar hum sab wapas laut gaye. Aaysha ki shaadi ka din aur aaysha udedbun mein lagi thi. Kabhi sochti ki sab kuch chod-chad kar anwar ke paas chali jaaye, kabhi sochti ki jahar kha kar iss jindagi ko hi khatam kar den. Par fir ammi-abba ki baaren mein sochti toh kud ko kosne lagti. Ki aisa galat kyon soch rahi hai iss sab main uske ammi-abba ki  toh koi khata nahi fir unhe saja kyon de.

Itne mein baraat aa gayi, chaaron ore patako ki aawaj, aatish baajiyan aur sahnaiyon ki awaajen par ye sab aaysha ko chub raha tha. Itne mein kaaji sahib aaysha ke paas aaye aur bole aaysha khanam tumhara nikah nawab anwar hussain vald nawab shahbaaj hussain ke saath kiya jata hai. Kya tumhe manjoor hai?  Aaysha kuch  na boli, aaysha abhi bhi anwar ke khayalon mein khoyi thi. Aaysha ki ammi ne aaysha ko jhanjhoda aur kaaji ki baat sun ne ke liye kaha.  Kaaji ne fir se apni baat dohrai, aaysha khanam tumhara nikah nawab anwar hussain vald nawab shahbaaj hussain ke saath kiya jata hai. Kya tumhe manjoor hai? Aaysha anwar hussain ka naam sunkar hakki-bakki rah gayi. Woh boli kaaji sahib aap galat naam bol rahen hain. Anwar hussain nahi anwar kureshi.

Kaaji sahib bole nahi beta humne thik naam liya hai nawab anwar hussain. Fir dulhe ki ore mukatib hokar bole kyon miyan yahi ijmen sharif hai na aap ka. Dulhe ne apna shahra hataya toh saamne anwar hussain baitha tha. Woh bola ji kaaji sahib yahi hai. Aaysha ne apni ammi ki ore dekha aur unke gale lag gayi. Fir boli haan hamen manjoor hain.

Darasal aaysha ki apne doston ke saath ho rahi baaton ko aaysha ke ammi-abba ne sun liya tha. Jab unhone dekha ki unki beti unki khusi ke liye apni mohbaat ko kurbaan kar rahi hai. Toh fir woh apni beti ki khusi main kyon khus nahi ho sakte. Aur fir unhone anwar kureshi ke parents se milkar us nikah ke liye mana kar diya aur anwar kureshi ki jagah anwar hussain se nikah padwa diya.

Iss tarah hamaare dost anwar hussain ko uske duniya aaysha khanam wapis mil gayi. Aaj woh masha allhah char beton aur do betiyon ke ammi aabba hain aur aaysha fir umeed se hai.

*****************

Punarjanam

Mein ek scientist hoon aur mera punarjanam par kabhi viswas nahi raha. Par ye baat main kuch din pahle tek hi kah sakta tha. Par kuch din pahle kuch aisa hua jisne mujhe hila kar rakh diya. Garmi ki chutiyaan padnewali thi. HAmara kisi hill station par jaane ka programme ban raha tha. Itne mein mere dost ka khat aaya. Usne mujhe apne shahar palanpur aane ka nauta diya. Palanpur, uttarakhand mein ek chota sa hill station hai.

Maine agale hi din delhi se palanpur jaane wali train pakadi. Train subah saath baje palanpur pahunchi. Main jaise hi train se uttara, mujhe dekhkar station master istabd rah gaya. Mujhe badi hairaani hui ki ye mujhe ghur kyon raha hai. Raaste main jo  bhi koi bujurg dekhta dang rah jaata. Main bada ajeeb sa feel kar raha tha. Mere rukne ka intjaam circuit house maon kiya tha, jo railway station se kuch hi duri par hai. Mere paas saman ke naam par ek chota sa bag aur ek suitcase tha. Jise main lekar paidal hi chal pada. Kuch dur chalne par maine dekha ki ek ladki sukhe pad eke neeche phoolon ki maala liye hue baithi hai. Sunsaan sadak aur ek akeli ladki mujhe thodi si hairaani hui. Lekin mere hosh tab ud gaye jab woh daudkar mere paas aai aur mere gale main phoolon ka haar daalti hui boli aap aa gaye Amar babu. Mujhe pata tha ki tum jaroor aaoge. Erre aise kya dekh rahe ho, mujhe pahchana nahi main Phulwa. Aur ye muche kyon kaat li. Aur fir Amar babu aa gaye, Amar babu aa gaye chillate hue ghati ki ore chali gayi.

Maine apne aap ko sambhala aur usi ladki ke baare main sochta-sochta circuit house ki ore badne laga. Jaise hi main circuit house pahuncha. Wahan ka chaukidar bhi mujhe dekhkar hairaan rah gaya. Ab tak mere sabar ka baandh tutne laga tha. Maine use dante hue poocha kaya dekh rahe ho?  Kabhi koi insaan nahi dekha? Main sameer, ravi ne mera yahan rukne ka intajaam kiya hoga.

Chaukidar mera saman uthate hue bola, haan aaiye sahib, aapka kamra tyar hai. Main aapka hi intjaar kar raha tha. Paani garam kar diya hai naha-dhokar fresh ho jaiye. Main chai banakar laata hoon. Chai peene ke baad maine thoda aaram kiya, itne mein ravi aa gaya. Main aur ravi market mein ghumne nikal gaye. Raaste mein kai log aise mile jo mujhe ghurne lagte. Maine ravi se poocha toh woh bola haan yaar main bhi notice kar raha hoon. Pata nahi log aise kyon behave kar rahe hain.

Fir maine subah wali ghatna ravi ko bata di. Ravi bhi hairaan rah gaya. Shaam ka samay tha. Hum log circuit house main baithe chai pi rahe they. Saamne aag jal rahi thi. Circuit house ka chaukidar aag ke paas baitha, lakdiyon ko hila kar aag ko bada raha tha.  Maine use se poocha ki ye Phulwa kaun hai. Woh hairaani se meri ore dekhne laga. Sahib aapne kyon poocha? Toh maine use bhi subah wali ghatna bata di. Woh bola aakhir aapki mulakaat Phulwa se ho hi gayi. Ab shayad uski aatma ko shanti mil jaaye.

Hum chaukidar ki baat sunkar kuch ghabra gaye. Fir chaukidar se poocha ki masla kya hai puri baat batao. Chaukidar ne kahani sunani shuru ki…………..

Kariban 25 saal purani baat hai. Phulwa isi circuit house main apne bapu ramdin ke saath rahti thi. Ramdin circuit house ka chaukidar tha. Aur yahan ki saaf-safai karta tha. Aur Phulwa yahan ki rasoi dekhti thi. Palanpur main beemaron ki dekhbhal ke liye sarkaar ne ek haspatal  banwaya tha. Lekin us haspatal  mein koi bhi nahi aata tha. Sab ke sab apna ilaaj yahan ke ek  ojha se karwate they. Haspatal ko shuru karne ke liye kai doctor aaye aur wapas chal gaye. Par haspatal ka kuch nahi hua. Fir bahut saalon ke baad iss haspatal main ek doctor aaye unka naam tha doctor Amar.

Doctor Amar apni MBBS ki padai khatam karne ke baad apni pahli posting ke liye palanpur aaye they. Woh isi circuit house main thehre they. Yahan aane ke baad jab unhone sarkaari haspatal ki haalat dekhi toh unki apni halat kharab ho gayi. Chaar kamro ka haspatal. Jiske ek kamre mein murgiyan thi doosre mein kitchen ka saaman, teesre main yahan ke compounder rambharose ki chaarpai aur chute ko store bana rakha tha jismein haspatal ka saara samaan rakh kar bahut bada sa  tala laga rakha tha.

Amar ne rambharose se poocha ki ye sab kya hai? Toh woh bola doctor babu yahan koi nahi aata. Isiliye maine yahin apna ghar bana liya. Saare din kuch karne ko nahi  hota isliye murgiyan paal li hain. Ab samay bhi kat jata hai aur aamdani bhi ho jaati hai. Amar ne rambharose ko daanta aur haspatal ko thik-thak karne ki hidayad di. Agle hi din rambharose ne haspatal ki safai kar di. Aur doctor Amar haspatal mein baithne lage. Ek saptah ho gaya. Ek bhi patient nahi aaya. Amar ke poochne par rambharose ne bataya ki yahan ke log doctors par bharosa nahi karte. Yahan ka doctor toh ek ojha hai jo jhad-phoonk se logon ko thik karta hai. Gaon ke log anpadh aur seedhe-sade hain isliye ojha ki baaton main aa jate hain.

        Amar ko samjhte hue der nahi lagi ki yahan haspatal se jyada ek school ki jaroorat hai aur yahan haspatal ko chalana ek tedi kheer hai. Idhar jab ramdin do-chaar dino se circuit house ki safai ke liye nahi aaya toh Amar ne rambharose se poocha ki ramdin kahan hai toh usne bataya ki woh beemar hai aur khat par pada hai. Amar ramdin ke ghar par use dekhne gaya. Wahan jakar usne dekha ki ramdin ek andhere kamre main pada hai. Saare khidki darwaaje band hain aur un par parde pade hain aur Phulwa mirch jalakar apne baapu ki najar uttar rahi hai.

Amar ko ye dekhar bada gussa aaya, usne Phulwa ko daanta. Aur poocha ye kya kar rahi ho. Phulwa boli baapu par buri najar ka saaya hai. Isliye najar uttar rahi hoon. Phir usne apne bapu ko ek tabij baandh diya aur boli ab ye ek-do din mein thik ho jaayenge. Amar gusse se kamre main gussa aur usne ramdin ke haath par  bandha tabij todkar faink diya. Saari khidkiyan kholi, taaki taaji hawa kamre main aa-ja sake. Ramdin ko examin kiya aur fir ek injection lagaya, do-teen goliyan khane ko di. Kal fir aayega kah kar chala gaya. Jaane se pahle Phulwa ko bola ki agar fir se ramdin ko taabij bandha toh kaam se nikal doonga.

Agle din Amar phir aaya usne poocha tumhaare baapu kaise hain. Boli bilkul thik hain. Bhala ho un ojha baba ka jinke wajah se bapu bilkul thik ho gaye. Warna tumhne toh unka taabij tod kar faink diya tha. Amar bola kya matlab? Phulwa boli main ojha baba ke ghar kal doobara gayi thi. Maine unhe saara haal bataya. Pahle toh woh bahut gussa hue. Phir mere maafi maangne par unhone fir se tabij main mantra phoonk diya. Amar ne poocha ki kya tumhne fir se apne baapu ko tabij baandh diya. Toh Phulwa boli mujhe kya bewkuf samjha hai. Tumne mana kiya tha, Isliye maine use apne haath par baandh liya hai. Ojha baba ne kha hai ki kyonki ye mere bapu hain isliye agar main bhi iss taabij ko baandh loon toh bhi ye thik ho jayenge aur dekho taabij ka kamal bapu bilkul thik ho gaye.

Amar ko toh pahle gussa aaya fir woh hansne laga. Tum nirakh murakh ho, bhala aise bhi kahin hota hai. Agar tumhaare bapu bhunkhe hain aur tum khana kha lo toh tumhaare bapu ka pate bhar jaayega. Phulwa boli nahi. Phir aise kaise ho sakta hai ki taabij tum apne haath par baandho aur tumhaare bapu thik ho jayen. Phulwa ko Amar ki baat thik lagi aur samajh main aa gayi. Amar ne Phulwa ko bataya ki ojha sabko bewkuf banata hai. Asar jhad-phoonk se nahi hota.  Jadi-butiyon se hota hai jo ojha khane ko deta hai.

Ye ek tarah ka ilaj hai jise aayurved kahte hain. HAmara ilaj jara alag hai ise allopath kahte hain. Iska asar jaldi hota hai. Phulwa samajhdar thi isliye use doctor babu ki baat jald samajh main aa gayi. Ab woh Amar ki madad karne lagi. Haspatal mein toh koi aata nahi tha isliye woh ghum-ghum ka illaj karne lage. Gaon mein har koi Phulwa ki baat manta tha woh daant-dapat kar sab ko illag ke liye tyar kar hi leti thi. Dawaiyaan bhi dheere-dheere apna asar dikhane lagi aur logon ka iss  illaj ke parti viswas badne laga.

Ab log haspatal mein aane lage. Phulwa nurse ki tarah sabki dekhbhal karti thi. Phulwa ke iss roop ko dekh kar Amar us par reejh gaya aur use pyar karne laga. Phulwa Amar ko Amar babu kahkar bulati thi. Mann hi mann woh bhi Amar ko chahne lagi thi. Jab Amar ne Phulwa ke samne shaadi ka prastav rakha toh use apne kaano par viswas nahi hua. Ab dono ke pyar ke charche pure palanpur main hone lage they. Amar ne ramdin se Phulwa ka haath maanga. Aur apni maa ko lene ke liye shahar ki taraf chal pada. Amar ne kaha ki woh ek hafte mein wapas aa jayega.

Ek hafte baad saara gaon doctor babu ka intjaar kar raha tha. Phulwa phooloon ka haar liye  champa  ke pade ke neeche baithi Amar babu ka intjaar kar rahi thi. Par Amar babu nahi aaye. Sabko badi nirasha hui. Gaon main tarah-tarh ki baaten hone lagi. Gaon wale doctor babu ko dhokebaaj kahne lage. Jo ki gaon ki bholi-bhali ladki ko pyar ke jhute wade dekar chala gaya aur ab woh kabhi nahi lautega.

Phulwa sabko dilasa deti thi Amar babu jaroor lautenge. Woh dhokebaaj nahi hain. Woh roj phoolon ka haar lekar champa  ke ped ke niche baithkar doctor babu ka intjaar karti thi. Haspatal fir se band ho gaya. 6 mahine ke baad, ek din fir se haspatal khula. Sara gaon haspatal ki ore bhaga par jab doctor sahib haspatal se bahar nikle toh logo ne dekha ki woh Amar babu nahi they. Poochne par doctor ne bataya ki yahan se shahar jaate hue doctor Amar ka raaste mein accident  ho gaya aur unka dehaant ho gaya. Isliye unki jagah mujhe bejha gaya hai.

Ye baat saare gaon mein aag ki tarah phail gayi.  Sabhi apne soch par dhuki they. Phulwa  champa ke ped ke neeche baithi phuloon ka haar liye Amar babu ka intajaar kar rahi thi. Jaise hi usne ye khabar suni usne wahin dum tod diya. Aaj 25 saal beet chuke hain iss ghatna ko. Logon ne kai baar ek ladki ko champa ke ped ke neech phoolon ka haar liye baite hue dekha hai. lekin Hum jaante hain ki woh ladki koi aur nahi Phulwa ki aatma hai. Ja aaj bhi Amar babu ki rah dekh rahi hai.

Aaj subah jis ladki ne tumhe phuloon ki mala pahnai woh koi aur nahi Phulwa ki aatma thi aur tumhaari shakal hu-ba-hu doctor Amar se milti hai. Isiliye station master aur purane log jo bhi doctor Amar ko jaante they, tumhe dekhkar hairaan they. Lekin iss sab se ek baat jo bahut achchi hui woh ye ki aaj Phulwa ka intjaar khatam ho gaya.

Chaukidaar toh kahani suna kar apni duty karne gate par pahunch gaya par hamaari halat patli kar gaya. Woh  raat maine bade muskil se nikali. Aur fir teen-chaar dino ki chutiyon ke baad delhi wapas aa gaya.  maine ghar pahunchkar apne saath hui ghatna ko sab ke saath share kiya. Shayad ab main punarjanam par viswas karne laga hoon.

Udhar palanpur main simran apne doston ke saath baithi hai. Nikalo ravi bhaiya das hajaar rupye nikalo. Main sharat jeet gayi. Bana diya na tumhaare dost ko bewkuf, kahte they bada intelligent hai, scientist hai aur woh punarjanam par viswas nahi karta. Dekhi meri acting aur direction, ab woh sirf punarjanam par viswas  hi nahi karega balki doosron ko apni aap biti bhi sunayega.

Ab bolo hun na main palanpur ki best actress aur best director, Phulwa ha, ha, ha, ha aur sab hansne lage.

****************

 

Amar Prem

Raat ke das baj rahen they. Party chal rahi thi. Halka-halka music baj raha tha. Garma-garam bahas chidi hui thi. Topics har pal badal raha tha. Kabhi raajniti kabhi samaj, kabhi shiksha aur kabhi western cultural. Iske allawa  aur bhi bade-bade Vishay jo sirf discuss karte hue hi achche lagte hain. Koi kabhi bhi inke liye kuch nahi karta siway baat karne ke aur gar kiya hota toh shayad discussion ke vishay fir kuch aur ho jaate. Khair sab ki sab apne-apne vichar rakh rahen they. Discussion ke dauran haatho mein jaam na ho toh bade logon ki parties kuch adhuri si lagti hain fir woh haath chahe aadmi ka ho ya aurat ka. Aamtaur par yahi najara hota hai bade logon ki parties ka. Aur party media people ki ho toh dikhawa aur tamasha jyada hota hai.

        Dev ka  aamtaur par aisi parties mein dam ghuta tha  par majburi thi shamil hona padta tha. Lekin Jab ghutan hadd  se bad jaati toh woh kise kone mein nikal jaata. Aaj bhi use bahut gutan ho rahi thi aur jab guttan bad gayi toh woh bahar bageeche mein nikal gaya. Bageeche mein koi pahle se hi jhule par baithe hue aasman ki ore tiktiki laga kar dekh raha tha aise lag raha tha jaise baithe-baithe  taaron ko gin raha ho aur hisab laga raho ki kahin kuch kam toh nahi ho gaye. Dev ne  uski tanhai ko bhang karte hue poocha kya hua kya party pasand nahi aai. Dev ki  aawaj sunte hi usne turant mud kar dekha. Dev ne  jaise hi use dekha toh hairaan rah gaya aur fir use dekhta hi rah gaya.

Wahi salona chehra, badi-badi aankhe, kamar tak jhulti hui lambi choti, maathe par badi si bindi kaano main bade se jhumke, cotton ki saari aur chehre par wahi tej par haan ek fark tha aur woh ye ki  thodi si safaidi aa gayi thi baalon par aur ek bada sa chashma lag gaya tha.

Ye Anupama thi. Woh bhi Dev ko dekh kar hairaan thi. Woh ek doosre ko ek tak dekhe ja rahe they. Bilkul maun kuch kahte hi nahi ban raha tha. Aisa lag raha tha maano unki  khamoshi hi ek-doosre se sawal aur jawab kar rahi ho. Dev Anupama ko dekh kar apne itihaas main chala gaya.

Anupama se Dev ki  pahli mulakaat ek party mein hi hui thi. Dev collage ke final year mein tha aur Anupama first year mein. Collage mein freshers ko welcome karne ke liye party di jaati hai.  Collage ki fresher party thi jab Dev Anupama se pahli baar mila tha.  Anupama dekhne mein bilkul seedhi-saadhi thi. Bilkul aam, seedha-sadha pahnava koi chatak-bhatak nahi. Par jab baaten karti thi toh apni har baat ko badi dridhta se rakhti thi.

Apni journalism ki padai puri karne ke baad, Dev ko ek akhbaar mein naukri mil gayi. Par shaam ka samay woh  abhi bhi campus mein dostoon ke saath hi bitaya karta tha. Rojana kisi na kisi vishaya par bahas chid jaya karti thi. Garam khun tha us samay har baat par josh aa jata tha. Duniya ko badalkar rakh dena chahte they. Sachachi se abhi tak wasta nahi pada tha. Isliye lagta tha ki bahut hi aasaan hai aur bas ek shuruwat ki jaroorat hai. Abhi tak kisi ne koshish hi nahi ki. Aur ab hum shurwat bhi karenge aur fir ek anjaam bhi denge.

Anupama campus mein hi girls hotel mein rahti thi. Isliye Dev ki us se roj hi mulakaat ho jaati thi. Woh bhi bahas mein bad chadkar hissa leti thi. Apne vicharoon ko bade hi jinda dilli se rakhti thi. Uske ander kuch kar gujarne ki chah thi. Jald hi Dev aur Anupama achche dost ban gaye. Dono ek-doosre ko bahut prabhavit karte they. Dono ki  dosti kab pyar mein badal gayi unhe pata hi nahi chala. Anupama ek rajpoot thi aur Dev ek Brahmin family ko belong karta tha. Isliye dono ki shaadiyon mein kaafi adchane thi. Anupama apne ghar mein sabse badi thi. Us se choti uski teen bahne thi. Uske parivaar waalon ko jaise hi unke pyar ke baare mein pata chala, Anupama ke pita ne uski shaadi tay kar di.

Unhe dar tha ki Anupama ki wajah se Anupama ki teen choti bahne bin byahi hi na rah jaayen. Ladka bank manager tha. Aur unki hi biradari ka tha. Ye baat Anupama ne apne aakhiri khat main Dev ko batai thi.  Khat ke saath shaadi ka card bhi tha. Dev ko  khat aur card shaadi ki date nikal jaane ke baad mila. Khat kuch iss prakaar se tha………….

Priy Dev,

Papa ne meri shaadi tay kar di hai. Ladka bank mein manager hai aur hamaari hi biradari ka hai. Yahan aane se pahle tumse mil kar aana chahti thi. Par tum mile nahi, pata chala ki kisi jaroori kaam se gaon gaye hue ho. Gaon ka pata mere paas nahi hai. Isliye ye khat aur card padosiyon ko diye ja rahi hoon. Jab tak tumhe ye khat mile, shayad main kisi aur ki ho chuki hongi.

Dev main bahut majboor hoon. Mere peeche meri teen choti bahne hain. Mere kisi bhi ek galat kadam se inki jindagi barbaad ho sakti hai. Hamaara ikhtiyaar keval apne jeevan par hota hai. Hum kisi aur ke jeevan se nahi khel sakte. Tum ek bahut hi achche insaan ho. Tumhe mujhse bhi achcha koi aur mil jaayega. Meri wajah se apna jeevan barbaad nahi karna. Apna ghar basa lena. Ye card isliye chode ja rahi hoon ki tumhe yakin ho jaaye ki ab main kisi aur ki amanat ho chuki hoon.

Aasha hai ki tum meri majboori ko samajh jaoge aur mujhe maaf kar doge.

                                                    Tumhaari Anupama

Tumhaari likhne ke baad Anupama ne tumhaari ko kaat diya tha aur Dev ko ishara kar diya tha ki ab uska Anupama par  koi ikhtiyaar nahi rah gaya hai.

Anupama ne khamoshi ko todte hue kaha erre Dev tum toh budhdhe lagne lage ho. Baalon mein safedi aa gayi hai. Kya baat hai bibi kyal nahi rakhti kya? Dev bola ki khyal rakhne wali toh card thama kar kahin gayab ho gayi. Fir kaun khayal rakhta.  Anupama Dev ki  sunkar istabd rah gayi. Uska sar chakraane laga aur paair ladkhadane lage. Dev ne use sambhala aur phir dono jhule par baith gaye. Anupama kamp-kampati awaaj mein boli Dev ye tumhne kya kiya? Mere liye, mere liye tumhne apni jindagi barbaad kar li. Uski aankkhe nam ho gayi aur chehra murjha gaya.

 Dev beech mein hi uski baat kaate hue bola ki meri baat chodo apni sunao kahan hai manager sahib. Ab toh tumhaare bachche bhi kaafi bade ho gaye honge. Milaoogi nahi unse. Anupama boli manager sahib thik-thak hi honge apne bibi-bachchon ke saath. Kya, kya matlab?

Anupama boli tumhe toh pata hi hai ki papa ka export ka business tha meri shaadi se kuch din pahle papa ko business mein bahut bada nuksaan hua. Jiski wajah se papa ko attack aa gaya aur woh nahi rahe. Aise samay main manager sahib ne rishta tod diya. Ghar ka saara bhar mere kandho par aa gaya. Ghar par lendaaron ki bheed lag gayi. Maine ghar bechkar papa ka saara karj chukka diya aur woh sahar chodkar apne gaon main apne pushtaini makaan par chali gayi. Wahin gaon mein teacher ki ek naukri kar li.

Ek-ek karke teeno bahno ki shaadi ho gayi. Aaj teeno apne gharon mein khush hain. Gaye saal maa bhi chal basi. Ab gaon mein dil nahi lag raha tha. Isliye shahar aa gayi. Bahano ne apne saath rahne ke liye bhi kaha par main kisi par bojh nahi ban na chahti thi. Papa ki maut ke baad bahut baar socha ki tumse miloon. Par main apna bojh tum par nahi daalna chahti thi. Aakhir woh meri jimmedariyan thi unhe mujhe hi nibhana tha. Bahano ki shaadi ke baad maa ne mujhe kai baar shaadi ke liye kaha par main nahi maani.

Maa kahti thi ki mere baad tera kya hoga? Is se toh achcha hota ki tu Dev se shaadi kar leti. Hamne tera jeevan barbaad kar diya. Main maa ko kahti thi ki tu aisa kyon sochti hai. Ye sab bhagwaan ki hi ichcha hai. Usne pahle bhi mere liye bahut kuch soch kar rakha hua tha aur aage bhi soch kar rakha hi hoga. Abhi yahan aaye ek hi hafta hua hai. Ek puraani saheli ke ghar par ruki hoon. Aur usi ke saath party mein aai hoon. Soch rahi hoon ki yahin koi naukri kar loon.

Anupama ki baaten sunkar Dev ki aankhen bhar aai. Usne kaha ek naukri hai uski najar mein karogi. Anupama Dev ki ore dekhne lagi. Dev ne jab se chaabi nikali aur Anupama ke haatho mein rakhte hue bola ki mere ghar ki chaabiyan hain. Tumhaari amanat thi aaj se tum hi sambhalo.

Anupama is se pahle kuch kahti Dev ne Anupama ko bahoon mein bhar liya aur Anupama Dev ki chaati se lipat kar rone lagi.

****************

Meera

Ye kahani tab shuru hoti hai jab main 12^th mein padti thi. Pados  ke Aniket bhiya ki shaadi hui aur uthal –puthal  hui mere jeewan mein. Ghar mein nayi  bhabhi aai unka naam tha AAkriti bahut hi sundar aur milansaar. Hum aur Aniket bhaiya bahut achche padosi they. Mujhe dar lag raha tha ki pata nahi bhabi ke aane se hum logon ke rishte kaise rahte hain.  Par bhabhi itani achchi thi ki unke aane se rishte aur bhi majboot ho gaye.

AAkriti bhabhi ke do bhai they Rahul aur Rohit. Shaadi ke samay Rahul post graduation kar rahe they. Aur rohit ne meri tarah 12^th ke exams diye they. Bhabhi apne bhaiyon ki bahut taarif kiya karti thi. Par jab unse mulakaat hui toh unko badkar paaya. Main pahli hi mulakaat mein Rahul ki diwani ho gayi. Woh  bahut hi meetha bolte they. Itna meetha ki sun ne walon ko diabities ho jaaye. Chote se lekar bade bujurg tak ko apni baaton se jeet lete they. Unki har baat mein apnapan jhalkta tha.

Rahul aur AAkriti bhabhi mein teen saal ka antar tha. Bhabhi badi thi. Par har masle par samjhane ka kaam Rahul ka hi hota tha. Rahul ke paas har samsya ka hal hota tha. Dono bhai-bahan kam aur dost jyada they. Waise toh Rahul se bahut jyada mulakaat nahi hoti thi. Par jab bhi bhabhi se baat hoti thi toh unka jikar jaroor hota tha. Hum kaafi chote they. Ghar mein aksar hum bhai-bahan jhagda karte they. Bhabhi hamen dekhkar hansti thi. Kahti thi ki tumhe ladte dekh kar bachpan ke din taaja ho jaate hain.

Bhabhi se Rahul ke baare mein itna suna ki woh mere dillo-dimag par cha gaye. Jab unse mulakaat hoti toh bas unki baaten hi sunti rah jaati. Shayad ander hi ander main unhe  pyar karne lagi thi. Lekin hum ek jaati ke nahi they. Isliye iss baat ka jikar bhi kabhi kisi se nahi kiya. Woh padne mein kaafi intelligent thi. Isliye padai puri hote hi unki naukri lag gayi. Phir ek din aaya jab bhabhi ne bataya ki Rahul ki shaadi tay ho gayi hai. Us din mein bahut royi. Rahul ki shaadi ke din main bhi shaadi mein shamil hui. Pata nahi kyon? Shayad us ladki ko dekhna chahti thi. Jiske wajah se mere sapne chaknachur ho gaye ya fir Rahul ki dulhe ke roop main dekhna chahti thi kyonki us ladki ko toh main baad mein bhi dekh sakti thi.

Jab Rahul ko dulhe ke roop mein dekha toh  uske baad kisi aur ko iss roop mein dekhne ki chah hi nahi hui. Samay beeta Rahul ek bachche ka pita ban gaya. Maine bahut koshish ki par unko apne dillo dimag se na nikal pai. Ab meri bhi shaadi ki umar ho gayi hai. Mere liye rishte aane lag gaye. Lekin pahle toh maine kai bahane banaaye par kuch samay baad saaf taur se shaadi ke liye mana kar diya. Bhabi se ab bhi unke maayke aur Rahul ki baat hoti thi. Bhabhi abhi bhi bade chav se Rahul ki baaten bataya karti thi. Unka har roop bada nirala tha. Chahe woh pati ka ho ya pita ka.

Par achanak ek bhuchal aaya aur rhaul ki jindagi mein uthal puthal ho gayi. Unka parivaar tutne laga. Unke aur unki wife ke beech mein tanaav aa gaya. Jo ki samay ke saath badne laga. Rahul ka jeewan narak ban gaya. Itna achcha insaan par uska jeewan saathi uthna hi bura. Usne kabhi bhi Rahul ki samjhne ki koshish nahi ki. Mujhe Rahul mein dhundhne se bhi koi kami nahi dikhai deti thi aur use kamiyon ki allawa kuch aur dikhai nahi deta tha.  Rahul bahut dukhi tha. Uske dukh ki wajah se aksar bhabhi ki aankhon mein aanshu aa jaate they. Par Rahul apne aanshuoon ko badi hi aasani se chupa jaate they. Unki  baaton se kabhi pata nahi chalta tha ki iss insaan ne apne ander itna dard chupa rakha hai. Woh insaan jiske paas har problem ke anekho hal hote they jiske paas option ki kami nahi hoti thi.

Aaj apne jeewan ki problem ke hal nahi dhundh pa raha tha. Itna dukh uski life mein jisne kabhi bhi kisi ko dukh na pahunchaya ho, pata nahi kis ki najar lag gayi. Kabhi kabhi lagta ki kahin meri hi toh nahi. Nahi meri nahi maine toh hamesha bhagwaan se unki khushi chahi. Aur hemesha ye hi maanga ki unki raah ka har kaanta mere daman main aakar gire. Maine toh unse pyar kiya tha.  Main karti bhi kya woh they hi aise ki kisi ko bhi un par pyar aa jaye.

Aakirkaar unki shaadi tut gayi. Unka talaak ho gaya. Talaak ki wajah se unke jeewan ki kadwahat toh kam ho gayi. Par woh kaafi ghum sum ho gaye. Jeewan ke  har imitihaan ko paas karne wala apne hi jeewan ke itne aham imitihaan mein fail ho gaya. Woh apne aap ko doshi maan ne lage. Ki jaroor un main hi koi kami rahi hogi jo woh apni shaadi ko nahi bacha paaye. Lekin unko jaan ne wala har insaan ye jaanta hai ki unmain koi kami nahi.

Khair achcha samay nahi raha toh bura samay bhi nahi rahega. Bhure samay ki ek achchi baat hoti hai ki woh bhi ek din khatam ho jaata hai. Samay har jakham ko bhar deta hai. Unka bhi jakham bharne laga hai.  Ab dheere-dheere unke chehre par hansi wapas lautne lagi hai. Unhe ab kabhi- kabhi khus dekh kar mere bhi armaan jagne lage hain. Par meri  badkismati ki unhone mujhe kabhi bhi us najar se nahi dekha. Aur meri majboori ki main na pahle kabhi kisi ko kuch kah paai aur na aaj kuch kah sakti hoon.

Lagta hai ye jeewan toh meera ki tarah hi bitaana padega radha ban na shayad meri kismet mein nahi par bhagwan se sirf ek prathna hai ki agle janam mein mujhe meera ya radha ka nahi rukmani ka isthan chahiye.

**************

Madhavi

Main apne mata pita ki eklauti aulad tha. Shaadi ke kariban 15 saal baad mera janam hua, isliye meri parvarish bahut hi lad-pyar se hui. Waise toh hum middle class ko belong karte they par fir bhi Ghar mein kisi cheez ki kami nahi thi. Mera bachpan bilkul rajsi tha, eklauta hone ke ye fayede hote hi hain aur main toh fir shaadi ke itne saal baad paida hua tha. Kisi bhi cheez mein sochne bhar ki der thi aur woh saamne hoti thi. Kab schooling hui, college hua pata hi nahi chala. Padhne main zahin tha isliye jald hi ek achchi sarkaari naukri bhi mil gayi. 

Din ke samay office mein aur shaam ka samay doston mein bitata tha. Dheere-dheere dost kam hone lage kuch ko naukri ke silsile mein doosre shahar jana pada, kuch ki shaadi ho gayi aur woh apni shaadi shuda zindagi mein busy ho gaye. Kuch ko private multinational company main job mil gayi toh woh der raat tak office mein hi busy rahne lage. Ab mera boriyat ka samay shuru ho gaya. Govt job hone ki wajah se  shaam hote hi ghar pahunch jata tha. Ab mujhe akelaapan sataane laga.

Waise toh main maa-babuje se bahut pyar karta tha par  maa-babuji mein aur mujh mein do generation ka gap tha. Isliye hamaari soch ka milna waise bhi possible nahi tha. Par fir bhi ek baat ka sahara hota tha ki kam se kam ghar par koi toh hai aur main bhi apna baaki ka bacha hua samay unke saath bitaataa tha. Par kismet ko shayad kuch aur hi manzoor tha. Maa-babuji ka ek accident mein swargwas ho gaya aur main akela rah gaya.  Unke jaane ke baad mujhe pata chala ki main unse kitna pyar karta tha. Aur fir kabhi-kabhi apne aap ko kosta tha ki maine kyon nahi aur samay unke saath bitaya.

Samay ke iss kutharaghat se main bilkul toot gaya tha . Kuch dino toh rishtedaaron ne saath diya par woh bhi kab tak apna ghar baar chod kar mere saath rahte. Ab mujhe ghar ke kaamo mein bhi badi muskil hone lagi. Chai banana aur ande ubaalne ke allawa mujhe kuch nahi aata tha. Aise samay mein papa ki baat yaad aaya karti thi. Woh kahte they ki beta thoda bahut kitchen ka kaam bhi seekh lo. Jab hum ghar par nahi hote toh hamein kam se kam iss baat ka toh sukun rahega ki  tum bhookhe nahi ho. Par tab unki baat ek kaan se suni aur doosre kaan se nikal di. Aaj pachta raha hoon ki kash unki baat maan li hoti. 

Halanki meri umar zyada nahi thi, par fir bhi maa kahati thi ki beta bahu le aao. Kab tak main rasoi mein padi rahungi. Tera bhi mann bahal jaayega aur mujhe bhi kitchen se chutti mil jaayegi. Agar maa ki woh  baat maan li hoti toh aaj na to akelapan satata aur na hi kitchen ka gam. Khair pados ki aunties ki wajah se khichadi banana seekh liya jiski wajah se mujhe bhuke pate nahi sona padta tha.

Aise main ek din meri postin south India ke ek chote se kasbe Kunnoor mein ho gayi. Meri job transferable hai. Isliye transfer refuse nahi kar sakte. Fir yahan koi tha bhi nahi     jiske liye rukta isliye chal pada. Ab zindagi kismet ke hawale kar di jahan lekar chalti hai chal pada. Shuru ke ek hafte toh office ke guest house mein guzara, fir office ke  ek colleague ki madad maangi ki kahin kiraaye ke ghar ka bandobast kar de. Chota kasba hone ki karan kiraaye ke makaan ka wahaan chalan nahi tha.

Sabke apne makaan they. Kasba bahut chota tha isliye jobs ke bahut zyada scope nahi they. Isliye outsiders bhi nahi they. Khair kaafi dhundhne par ek makaan mil gaya. Ghar kaafi bada tha mujhe chat par ek bada sa kamra aur ek kitchen de diya gaya. Ghar ki malkin ne mujhe ye makaan badi majboori mein diya tha. Unki maali haalat achchi nahi thi. Unki koi permanent aamdani nahi thi.  Pahle toh ghar ka kharch kheti-baadi se chalta tha. Par kuch saal pahle ghar maalik ne bank ka karz wapas na kar paane ki haalat main aatmhatya kar li thi.

 Ye south India mein aajkal aam baat hai. Har saal kai kisaan jab bank loan return nahi kar paate toh aatmhatya kar lete hain. Sarkaar bhi aankhe band kar ke baithi hai. Kisaano ki dayniy haalat hai. Par govt. kuch nahi kar rahi. Jis saal number of suicides badh jaate hain, us saal kuch kisaano ka loan maaf ho jata hai. Iske allawa koi sarkari madad nahi. Sthiti ko sudharne ke liye kaagazon par toh bahut kuch hota hai par zamini haqikat kuch aur hi hai.

Khair is ghar ki  haalat bhi kuch aisi hi hai. Mrs. Rao apne chaar bachchon ke saath rahti hai. Do ladke aur do ladkiyan. Sabse badi Madhavi jiski umr sirf 20 saal hai, fir 15 saal ka Vanshi, fir 12 saal ki Naglaxmi aur sabse chota 8 saal ka Sri Nivasa. Kheti–baadi aurat ke bas ki baat nahi isliye ye saara kaam unke devar dekhte hain. Aur badle main guzaare layak anaaj de jaate hain. Madhavi pados ke bachchon ko music aur dance seekhati hai. Uske badle jo aamdani hoti hai us se baaki bachchon ki padai hoti  hai.

Mrs. Rao ados-pados ke kapde silti hain. Aur khali samay main nariyal ke reshon se rassiyan banati hai. Ye aamdani ghar ke baaki kharchon ke allawa emergency main kaam aati hai. Mere unke ghar mein kiraaye par aane ki wajah se unki mushkilon se bhari zindagi mein kuch aaram aa gaya tha. Waise toh who log bahut achche they, par chah-kar bhi woh meri koi madad nahi kar paate they. Main unki Telugu bhasha nahi jaanta tha aur who meri hindi nahi jaante they. English mein bhi ghar mein sabhi ka haath tang tha. Thodi bahut hindi aur english Madhavi aur Vanshi jaante they, par woh jab available nahi hote they toh mujhe badi muskil hoti thi. Mrs. Rao toh zyada padhi-likhi nahi thi aur baaki dono bachche  abhi chote they.

Par dheere-dheere maine telugu seekhna shuru kar diya. Taaki mera kaam chal sake. Ismein bahut zyada kathinai nahi aai. Uss illake main telugu bolne waale logon ki bahutayat thi. Office main bhi mere colleague isi bhasha main baat karte they. So thoda-thoda main bhi seekhne laga tha. Jagah nayi thi isliye main apni aadat ke anusaar chutti hote hi ghar aa jaya karta tha. Shaam ke samay Madhavi bachchon ko classical dance sikhaya karti thi. Main aksar chhat par se usse dance seekhate hue dekha karta tha.

Bachchon ko dekh-dekh kar main bhi thode bahut steps seekh gaya tha. Akele main kabhi kabhi un steps ki practice bhi kiya karta tha. Ek din Madhavi ne mujhe dance karte hue dekh liya. Woh chupchap mujhe dekhti rahi fir achanak mujhe tokte hue boli, “ye step galat hai, isse aise nahi aise karo…  Toh chup-chup kar dance seekh rahe ho aur guru shayad main hi hoon. Fir nikalo guru dakshina.” Aur fir hansne lagi.  Fir boli, “agar dance achcha lagta hai toh seekhte kyon nahi?” Maine kaha, “sharm aati hai…  Khair samay mile toh tum hi seekha dena.”

Ab Madhavi aksar chhat par aane lagi aur kabhi-kabhi mujhe dance bhi sikhaane lagi. Iske badle mein, main use thodi bahut English aur hindi seekha diya karta tha. Issi beech ek din Madhavi ko pata chala ki main hafte ke saaton din khichdi khata hoon. Woh pahle toh dukhi hui fir usne apni maa se baat karke mujhe bhi khana apne saath khane ke liye kaha. Andha kya maange do nain, yahan toh chaar mil rahe they. Maine bhi jhat se haan kar di. Ab main unhi ke saath khana khane laga. Aur kirayedaar se paying guest ban gaya. Main khane ke liye unhe kuch paise alag se dene laga. Kabhi-kabhi rashan aur sabji bhi market se le aata tha.

Ab main ghar walon se kaafi achchi tarah se ghul mil gaya. Ghar ke chote-mote kaamo mein bhi haath batane laga. Khali samay mein bachchon ko padhane laga. Unke ghar mein ek jo mard ki kami thi woh thodi-thodi bharne lagi thi. Main bhi unke ghar ka ek sadasya ban gaya tha. Dheere-dheere samay beetne laga mujhe unke saath kariban chaar saal ho gaye. Vanshi 12^th pass kar chuka tha. Uska MBBS mein selection ho gaya tha. Lekin fees ke chalte admission nahi le pa raha tha.

Par mere zidd karne par Mrs. Rao ne Vanshi ko MBBS karne ke liye Bangalore bhej diya.  ‘Mere zidd karne par…’, haan in char saalon mein, maine is ghar mein woh jagah bana li thi ki ab main zidd kar sakta tha aur meri zidd maani bhi jaati thi. Darasal main iss pariwar mein kaafi ghul mil gaya tha. Ek baar ki baat hai, Mrs. Rao ki tabiyat kuch kharab ho gayi. Check up karane par pata chala ki unhe dil ki bimaari hai. Baat tab bigad gayi jab unhe pata chala ki unke devar ne unki saari zameen  dhoke se hadap li hai.

Ye jameen hi unke bure waqt ka sahara thi. Isse bechkar hi woh apni betiyon ki shaadi karna chahti thi. Devar ke iss dokhe ko woh bardasht nahi kar paai aur unhe heart attack aa gaya. Unhe hospital mein bharti karwaya gaya. Doctor ne by-pass ki salah di. Kariban 2.5 se 3 lakhs ka kharcha tha.  Saara parivar toot gaya. Bachche saare din bhar rote rahte they. Woh apne pita ko kho chuke they ab apni maa ko nahi khona chahte they. Par woh asahaay they. Madhavi apne chacha ke paas gayi gidgidaai par unhone koi madad nahi ki. Unke iss dukh ko mujhse zyada kaun samajh sakta tha. Main apne parivaar ko kho chuka tha.

Maine bagair kisi ko bataaye hospital mein saare paise jama kara diye. Mrs. Rao ka operation theek thaak ho gaya. Doctor ne unhe precautions lene ke liye kaha aur fir kuch dino ke baad unhe discharge kar diya.  Mrs. Rao ke bahut poochne par Doctor ne unhe bata diya ki paise maine diye hain. Us din shaam ko Mrs. Rao ne mujhe bulakar poocha ki maine paise kyon diye. Mera unse kya rishta hai. Aur woh mera itna bada karz kaise chukayengi. Maine unhe bataya ki main apna parivaar kho chuka hun, aur ek anaath ki zindagi jee  raha hoon.

“Itni badi duniya main baigair kisi apne ke jeena kitna mushkil hota hai, main achchi tarah jaanta hoon. Bhagwaan ne mujhe doosra pariwar diya hai aur aap ko khokar main iss doosre parivaar ko bhi nahi khona chahta.” Itna kahte hi mere aansu nikal aaye. Mujhe dekh kar ghar ke sab log rone lage. Mrs. Rao ne mujhe gale laga liya aur boli aaj se mere chaar nahi paanch bachche hain. Tabse main us ghar ka ek sadasya ban gaya.  Aur mujhe bhi zidd karne ka adhikaar mil gaya.

Iske baad ek din woh bhi aaya jisne mujhe pareshaan kar diya. Madhavi 24 saal ki ho gayi thi. Ek din uske liye ek rishta aaya. Ladka bank mein kaam karta tha. Mrs. Rao ne mujhe bulaya aur bataya ki Madhavi ke liye rishta aaya hai. Ladka bank mein kaam karta hai aur hamaari jaat ka hai. Khaate peete ghar ka hai aur bagair dahej ke Madhavi se shaadi karna chahta hai. Bhala is se achcha rishta hamen kahan milega. Woh saamne se khud chalkar ye rishta maangne aaye hain. Agar yahan Madhavi ki shaadi ho jaati hain toh Madhavi ke bhag khul jaayenge.

“Aur fir mujh vidhwa ki liye is se badkar kya baat ho sakti hai ki woh log bagair kisi dahej ke meri beti se shaadi karne ke liye tayyar hain. Bolo beta tumhaari kya salaah hai. Agar tumhe thik lagta hai toh tum Madhavi se baat karo.”  Mere muh se ek bhi shabd nahi nikla. Main chupchap unki baat suntaa raha. Aur ant mein “jaisa aap chahe…” kahkar chala aaya.

Madhavi ki shaadi ke baat sunkar mujhe pata nahi khushi nahi ho rahi thi. Ek ajeeb si bechaini hone lagi mera dam ghutne laga, aise lag raha tha jaise saans nahi liya ja raha hai. Main daudkar chhat par chala gaya taaki khuli hawa mein saans le sakun, par kuch fayda nahi hua. Kuch der mein Madhavi bhi chhat par aa gayi aur boli maa kah rahi thi ki tumhe mujhse kuch baat karni hai. Darasal Madhavi ne maa ki saari baaten sun li thi. Lekin fir bhi woh mujh se kuch sunana chahti thi.

Maine bagair uski taraf dekhe use jhidak diya. “Abhi mujhe kuch nahi kahna, mujhe pareshan mat karo.” Madhavi chali gayi aur main apne aap ko tatolta raha ki mujhe kyon Madhavi ke rishte se khushi nahi ho rahi.  Agle din Madhavi ne mujhse kaha ki maa kah rahi thi ki mere liye ek rishta aaya hai. Mujhe kya karna chahiye?  Maine kaha ki ab tum koi bachchi nahi ho badi ho chuki ho ye tumhaari zindagi hai, iska faisla tumhe lena hai, isliye iss faisle ko tum khud lo. Madhavi boli, “ye toh theek hai par ye itna bada faisla hai ki dar lag raha hai, main galat decision bhi toh le sakti hoon. Isliye tumhaari rai lena chahti hoon.”

Maine kaha, “Mrs. Rao ek heart patient hain, tumhe unki khushi ka khayal rakhna chahiye.”

Madhavi boli, “kya tum iss rishte se khush ho?”

Main gusse se bola, “ab meri khushi ki baat kahan se aa gayi.”

“Lekin main jaanana chahti hoon.”

“Haan mujhe khushi hogi, bahut khushi hogi.” 

Main gusse se bahar chala gaya. Madhavi bhi rote-rote apne kamre mein chali gayi.

Mrs. Rao ne rishte ke liye haan kar di. Sagai ka din pakka ho gaya. Pahle navraatri ko mangni aur dashmi ko shaadi. Ghar main shaadi ki tayyariyan hone lagi. Ghar mein rang rogan, kapdo ki shopping aur gahno ki khariddaari hone lagi. Halaanki ladke waalon ne dahej ke liye mana kiya tha, par fir bhi ek maa apni beti ki shaadi ki tyari uske janam se hi kar deti hai aur fir thoda bahut toh loklaaj aur lok dikhave ke liye bhi karna padta hai.  

Mrs. Rao ne bhi kaafi kuch jod rakha tha. Bas zaroorat thi usko ek naya roop dene ki. Jaise-jaise din nazdeek aane lage Madhavi ka chehra murjhane laga. Woh jab bhi akeli hoti rone lagti. Har samay khilkhilane wali Madhavi gumsum rahne lagi. Ab woh mujh se nazrein churaane lagi. Idhar main bhi chid-chida ho gaya. Ghar mein toh normal rahne ki koshish karta, jhoothi hansi hansta, par office mein baat-baat par jhagad padta. Har baat par gussa ho jata. Dheere-dheere mujhe iss baat ka ehsaas ho gaya ki main Madhavi se pyar karta hoon.

Aur isiliye main uske rishte ki baat ko sah nahi pa raha hoon. Usko kho dene ke dar se dukhi rahta hoon. Par main majboor hoon kuch kar nahi sakta. Mrs. Rao ek heart patient hain agar unhe iss baat ka pata chala toh woh iss baat par kaise react karengi. Mere baare mein kya sochengi.  Kahin woh iss baat ko jhel nahi paai aur unhe phir se attact aa gaya toh. Fir main unki caste ka bhi toh nahi hoon.

Mujhe kahin na kahin iss baat ka viswas tha ki Madhavi bhi mujhe chahti hai.  Par woh mera faisla sun na chahti hai. Woh ek ladki hai, woh apne dil ki baat zubaan par nahi la sakti. Fir maine aaj tak use kuch kaha bhi nahi hai ki main uske baare mein kuch feel karta bhi hoon ya nahi. Shaadi ke din nazdeek dekh kar Vanshi bhi kuch din pahle ghar aa gaya.  Vanshi ab kaafi bada ho chuka tha aur sab kuch samajhne laga tha. Usse ghar ka mahaul kuch badla-badla sa laga.

Main aur Madavi sabke saamne toh khush rahne ka dhong karte par akele mein dhukhi ho jaate. Vanshi ne iss baat ko  bhaanp liya. Mrs. Rao bhi ghar ke iss badle hue mahaul ko notice kar rahi thi. Fir ek maa se apne bachchon ka dukh nahi chupta, woh sabkuch samajh leti hai. Ek din usne shaam ko sabko bulaaya. Maine aaj Madhavi ke rishte ke liye mana kar diya. Main aur Madhavi Mrs. Rao ko hairaani se dekhne lage. Woh boli maine uske liye ek doosra ladka dekh liya hai, pahle waale se bhi achcha. Madhavi fir se pareshaan ho gayi aur main dukhi.

Itne main Mrs. Rao ne Vanshi ko kaha, “Vanshi nikalo toh” aur vanshi ne apni jeb se ek anguthi nikali aur mere ore badhaate hue bola, “pahnao jijaji didi ko anguthi.”  Vanshi ke in shabdon ko sunkar mere hosh udd gaye. Vanshi ne mujhe chutki kaati aur bola, “kya hua, ladki pasand nahi hai kya?” Maine kaha, “nahi nahi, aisi baat nahi hai” aur jaldi se Vanshi ke haath se anguthi lee aur Madhavi ko pahna dee.  Sab hamein dekh kar hansne lagey. Maine aur Madhavi ne maa ke paair chu kar aashirwad liya. Main aur Madhavi dono ek doosre ko dekh rahe they, hum dono ki aankhon mein aanshu they. Hum dono ko akela chodkar sab kamre se baahar nikal gaye.

******